बुटवलमा पहिरो जाँदा ३ घर क्षति, एक दर्जन घर उच्च जोखिममा
बुटवल । अविरल वर्षाका कारण पहिरो जादा बुटवल उपमहानगरपालिका–३ ज्योति नगरमा तीन जनाको घरमा क्षति पुगेको छ भने, एक दर्जन घरहरु उच्च जोखिममा रहेका छन् ।
चुरे पहाडबाट खसेको पहिरोले मनमाया भाट क्षेत्रीलगायत तीन जनाको घरमा क्षति पुर्याएको छ। निरन्तर परेको पानीले पहिरो अझै खस्न सक्ने जोखिम रहेको स्थानीयले बताएका छन् । इलाका प्रहरी कार्यालय बुटवलका डिएसपी मदन कुवँरका अनुसार एक दर्जन जति घरहरु जोखिममा रहेकाले अहिले स्थानीयलाई अन्यत्र सुरक्षित स्थानमा सारिएको छ ।
उनले भने, ‘अझै जोखिम छ । हामीले त्यहाँ रहेका मानिसहरु अन्यत्र सारेका छौँ ।’ बुटवलको गोल पार्कदेखि लक्ष्मीनगर जाने सडकमा पहिरोले क्षति पुर्याएर आवतजावतसमेत अवरुद्ध भएको थियो । पहोरोले त्यहाँ रहेको बिजुलीको पोलसमेत बगाएको छ ।
प्रत्येक वर्ष बर्षातको मौसममा यहाँका स्थानीयहरुमा पहिरोको त्रास हुने गर्दछ । बस्ती माथिको पहाड थोरै थोरै मात्रामा खस्दा घरहरुमा प्रत्येक बर्ष क्षति हुने गरेको छ ।
