सात वर्षपछि पहिलो पटक भारतले किन्यो इरानी तेल

नयाँ दिल्ली । भारतले सात वर्षपछि पहिलोपटक इरानसँग कच्चा तेल किनेको छ । पश्चिम एशियामा जारी द्वन्द्वका कारण आपूर्ति अवरुद्ध भएपछि भारतले यस्तो कदम चालेको हो । भारतीय तेल मन्त्रालयका अनुसार स्ट्रेट अफ हर्मुज हुँदै हुने तेल आपूर्तिमा अवरोध आएपछि भारतीय रिफाइनरीहरूले इरानबाट समेत तेल सुनिश्चित गरेका छन् ।

गत महिना अमेरिकाले आपूर्ति अभाव कम गर्नका लागि इरानी तेल तथा प्रशोधित इन्धनमाथिको प्रतिबन्ध अस्थायी रूपमा हटाएको थियो । मन्त्रालयका अनुसार भारतले आगामी महिनाहरूका लागि आवश्यक कच्चा तेलको पूर्ण व्यवस्था गरिसकेको छ । भारतले ४० भन्दा बढी देशबाट तेल आयात गर्दै आएको छ । कम्पनीहरूलाई व्यापारिक आधारमा विभिन्न स्रोतबाट तेल किन्ने स्वतन्त्रता छ ।

यसैबीच भारतले इरानबाट ४४ हजार मेट्रिक टन तरलीकृत पेट्रोलियम ग्यास (एलपीजी) पनि किनेको छ । उक्त ग्यास बोकेको जहाज बुधबार मैंगलोर बन्दरगाहमा पुगेको र हाल इन्धन उतार्ने काम भइरहेको मन्त्रालयले जनाएको छ ।