पश्चिम एसियामा युद्धको सम्भावना बढ्दै, क्षेत्रीय तनाव चुलिँदै

काठमाडौँ ।  अमेरिकाले पश्चिम एसियामा हजारौँ थप सैनिक पठाउन थालेको छ । डोनाल्ड ट्रम्प नेतृत्वको प्रशासनले इरानसँग वार्ता प्रगति भएको दाबी गर्दै, सम्झौता नभए युद्ध अझ बढाउन सकिने चेतावनी दिएको छ ।अमेरिकी रक्षा मन्त्री पीट हेगसेथका अनुसार, ठूलो युद्धपोत ‘युएसएस जर्ज एच. डब्ल्यू. बुश’ सहित विनाशकारी जहाजहरू मध्यपूर्व पठाइएका छन् । यस युद्ध समूहमा करिब ६ हजारभन्दा बढी नौसैनिक रहेका छन् ।

त्यसैगरी, ८२औँ एयरबोर्न डिभिजनका हजारौँ सैनिकहरू पनि उक्त क्षेत्रमा पुग्न थालेका छन् । यीमध्ये केही सैनिकहरू हालै थप रूपमा पठाइएका करिब १५ सय प्याराट्रुपरहरूमा पर्छन् ।

अमेरिकी प्रशासनले ती सैनिकहरूको ठ्याक्कै भूमिका सार्वजनिक गरेको छैन । तर, ८२औँ एयरबोर्न डिभिजन कठिन तथा जोखिमपूर्ण क्षेत्रमा हवाईमार्गबाट प्रवेश गरी महत्वपूर्ण स्थान र विमानस्थल नियन्त्रण गर्न प्रशिक्षित बल हो ।

यसअघि पनि करिब दुई हजार ५०० मरीन सैनिक बोकेको एक जहाज मध्यपूर्व पुगिसकेको छ भने थप दुई हजार ५०० मरीन सैनिक पठाइँदैछन् ।रक्षामन्त्री हेगसेथले स्थलसेना पठाइने वा नपठाइनेबारे स्पष्ट नभएको बताए । उनका अनुसार, “युद्ध जित्नका लागि आफ्नो रणनीति शत्रुलाई खुलाउन हुँदैन ।”

यसबीच, अमेरिकी सेनाको उपस्थितिले क्षेत्रमा थप दबाब सिर्जना गरेको छ । पहिलेदेखि नै ठूलो सङ्ख्यामा सैनिक तैनाथ रहेका छन् ।अर्कोतर्फ, विश्वकै ठूलो विमानवाहक जहाज ‘युएसएस जेराल्ड आर. फोर्ड’ मा आगलागी भएपछि मर्मतका लागि फर्काइएको थियो । जहाजमा क्षति पुगेपछि सयौँ सैनिकहरूको बसोबास प्रभावित भएको बताइएको छ ।सैन्य अधिकारीहरूका अनुसार, उक्त जहाजको तैनाथी अवधि असाधारण रूपमा लामो हुने सम्भावना छ, जसले नयाँ रेकर्ड कायम गर्न सक्छ ।