खाडीभर जारी छ इरानी आक्रमण
तेहरान । पश्चिम एशियामा अहिले जारी युद्ध कहिले र कुन अवस्थामा रोकिएला भन्ने आकलन गर्न कठिन छ । इजरायी प्रधानमन्त्री बेन्यामिन नेतन्याहुले इरानसँगको युद्ध आधा बिन्दुभन्दा पर पुगेको भन्ने अभिव्यक्ति दिएपनि उनले युद्ध कहिले सकिएला भन्नेमा केही बताएनन् ।
त्यसैगरी, इरानले हानेको ड्रोन लागेर दुबईमा दुई मिलियन ब्यारेल तेल बोकेको ट्यांकरमा आगो लागेको थियो । यूएईको सरजाहमा गए राति ड्रोनले थुराया दूरसंचार कम्पनीको प्रशासनिक भवनलाई निशाना बनाएको छ ।
यस घटनामा कोही पनि घाइते नभएको जनाइएको छ । साउदी अरबमा पनि अवरोध गरिएको ड्रोनको टुक्रा खसेर छ वटा घरमा क्षति पुगेको खबर आएको छ । यस क्रममा कोही पनि घाइते नभएको साउदीको सिभिल डिफेन्सले एउटा विज्ञप्ति जारी गर्दै भनेको छ ।
कुवेतको सेनाले पनि आफ्नो क्षेत्राधिकारमा ड्रोन र मिसाइल आक्रमण रोक्न सक्रियता बढाएको छ । माइक्रो ब्लगिङ वेबसाइट एक्समा एउटा पोष्टमा सेनाले आकाशबाट आउने सम्भावित आक्रमणलाई आफूहरूले निरन्तर निगरानी गरिरहेको भनेको छ ।
