स्पेसएक्सको स्टारलिंक भू-उपग्रहमा खराबी, सञ्चार सम्पर्क विच्छेद
वासिङ्टन डिसी । तीन महिनाको अन्तरालमा दोस्रो पटक स्पेसएक्सको स्टारलिंक भू-उपग्रहमा प्राविधिक खराबी आएपछि अन्तरिक्षमा टुक्राहरू फैलिएका छन्। मार्च २९ मा ‘स्टारलिंक-३४३४३’ नामको भू-उपग्रहमा समस्या आएपछि त्यससँगको सञ्चार सम्पर्क विच्छेद भएको स्पेसएक्सले मार्च ३० मा पुष्टि गरेको हो।
यद्यपि, स्पेसएक्स र लियोल्याब्स दुवैले यसबाट तत्काल कुनै ठूलो जोखिम नरहेको बताएका छन्। स्पेसएक्सले यी टुक्राहरूले अन्तर्राष्ट्रिय अन्तरिक्ष स्टेशन (आईएसएस) वा आगामी आर्टेमिस २ प्रक्षेपणलाई कुनै असर नगर्ने स्पष्ट पारेको छ।
कम उचाइमा घटेको घटना भएकाले यी टुक्राहरू केही हप्ताभित्रै वायुमण्डलमा खसेर नष्ट हुने अनुमान गरिएको छ। यसअघि डिसेम्बर १७ मा पनि अर्को स्टारलिंक भू-उपग्रहमा यस्तै प्रकारको समस्या देखिएको थियो।
प्रारम्भिक अध्ययनका अनुसार बाह्य टक्कर नभई इन्धन ट्याङ्की वा ब्याट्री जस्ता आन्तरिक स्रोतका कारण यस्ता समस्या आएको हुनसक्ने देखिएको छ। अघिल्लो पटकको घटनापछि स्पेसएक्सले केही समयका लागि प्रक्षेपण रोकेको भए पनि यस पटक भने कम्पनीले आफ्नो नियमित उडान जारी राखेको छ। स्पेसएक्सको टोलीले अहिले यस खराबीको मुख्य कारण पत्ता लगाउन अनुसन्धान गरिरहेको छ।
