एपस्टिन मुद्दामा सवा ७ करोड डलर तिर्न बैंक अफ अमेरिका सहमत

वासिङ्टन डीसी । अमेरिकी बहुराष्ट्रिय लगानी बैंक तथा वित्तीय सेवा प्रदायक बैंक अफ अमेरिका दिवङ्गत यौन दुराचारी जेफ्री एपस्टिनसँग सम्बन्धी मुद्दा राफसाफ गर्न पीडितलाई पैसा दिन  सहमत भएको छ । एपस्टिनको यौन दूर्व्यवहारलाई सहजीकरण गरेको आरोप लगाउँदै महिलाले बैंकमाथि देवानी मुद्दा दायर गरेको शुक्रबार अदालती कागजातले देखाएको भन्दै रोयटर्सले समाचार छापेको थियो ।

बैंकका वकिल र महिलाले यही महिना आफूहरू ७ करोड २५ लाख डलरमा मामिला सल्टयउने सहमतिमा पुगेको म्यानह्याटनस्थित अमेरिकी जिल्ला अदालतका न्यायाधीस जेड राकोफलाई भनेका थिए । तर प्रारम्भिक रूपमा सम्झौताको सर्तहरू सार्वजनिक गरिएको छैन ।

‘यस मुद्दामा हामीले पहिले दिएका बयानहरूको समर्थन गर्छौँ, जसमा बैंकले यौन तस्करीमा सहयोग गरेको छैन भन्ने कुरा पनि समावेश छ । तर यस सहमतिले हामीलाई यो मुद्दा अन्त्य गर्न अनुमति दिन्छ र मुद्दा दायर गर्नेहरूलाई थप मानसिक शान्ति प्रदान गर्छ,’ बैंक अफ अमेरिकाका प्रवक्ताले भनेका छन् । 

अहिलेको अवस्थामा क्लाइन्टका लागि समझदारी उत्तम विकल्प भएकोमा उनीहरूले जोड दिएका थिए । अदालतका कागजात अनुसार, वकिलहरूले सम्झौताको करिब ३० प्रतिशत वा लगभग २ करोड १८ लाख डलर कानुनी शुल्कको रूपमा माग गर्न सक्नेछन् । सम्झौतालाई अन्तिम अनुमोदन न्यायाधीश राकोफले गर्नुपर्नेछ । न्यायाधीशले बिहीबार यस सम्झौता अनुमोदन गर्ने विषयमा सुनुवाइ तय गरेका छन् ।