गुटेरेसले भने, ‘अब युद्ध रोक्ने बेला भयो’

न्युयोर्क । संयुक्त राष्ट्रसंघका महासचिव एन्टोनियो गुटेरेसले अमेरिका र इजरायललाई अब युद्ध अन्त्य गर्ने समय आएको सन्देश दिएका छन्। उनले इरानलाई पनि आफ्ना छिमेकी देशहरूमाथि आक्रमण बन्द गर्न आग्रह गरेका हुन्। 

उनले सशस्त्र समूह हेजबुल्लाहलाई इजरायलमाथि आक्रमण नगर्न र इजरायललाई पनि लेबनानमा आफ्ना सैन्य कारबाही र हवाई हमलाहरू बन्द गर्न आह्वान गरे। उनले गाजामा देखिएको विनाशकारी मोडल लेबनानमा दोहोरिन नहुने भन्दै विश्व समुदायलाई सचेत गराए।

उनका अनुसार युद्धले केवल विनाश मात्र निम्त्याइरहेको छ र यसलाई रोक्न अब ढिला भइसकेको छ। लेबनान र इजरायलको सीमा क्षेत्रमा बढ्दै गएको सैन्य तनावले समग्र मध्यपूर्वको शान्तिलाई नै खतरामा पारेको उनको बुझाइ छ। गुटेरेसले युद्धरत सबै पक्षलाई संयमित बन्न र कूटनीतिक बाटोबाट समस्याको समाधान खोज्न पटक–पटक आग्रह गरिरहेका छन्।