इरान वार्ताका लागि निकै आतुर छ तर ज्यान जाने डरले बोल्न सकेको छैन : ट्रम्प
वासिङ्टन डिसी । अमेरिकी राष्ट्रपति डोनाल्ड ट्रम्पले इरान यतिबेला अमेरिकासँग सम्झौता गर्न निकै आतुर रहेको तर आफ्नै जनता वा अमेरिकाबाट मारिने डरले खुलेर बोल्न नसकेको दाबी गरेका छन्। वासिङ्टनमा आयोजित एक कार्यक्रममा बोल्दै ट्रम्पले मध्यपूर्वमा आफ्नो प्रशासनले चालेका कदमहरूले इरानलाई वार्ताको टेबुलमा ल्याउन सफल भएको जिकिर गरेका हुन्।
इरानले १५ बुँदे युद्ध अन्त्यको योजनालाई तत्कालै स्वीकार नगरे पनि दुवै पक्षबlच मध्यस्थकर्तामार्फत सन्देश आदानप्रदान भइरहेको बुझिएको छ। अमेरिकी अधिकारीहरूका अनुसार युद्ध रोक्ने उपाय खोज्नका लागि पाकिस्तानमा एउटा बैठक आयोजना गर्ने तयारी समेत भइरहेको छ। यसले अमेरिका र इरानबिचको तनाव कम गर्न कूटनीतिक प्रयास जारी रहेको संकेत गर्छ।
यता इरानी विदेशमन्त्री अब्बास अराघचीले भने अमेरिकासँग विभिन्न माध्यमबाट सन्देश आदानप्रदान भइरहेको स्वीकार गरे पनि त्यसलाई औपचारिक वार्ता भन्न नमिल्ने बताएका छन्। उनले अहिले भइरहेका संवादहरू केवल सन्देश पुर्याउने काममा मात्र सीमित रहेको र यसलाई पूर्ण रूपको वार्ता मान्न नसकिने अडान राखेका छन्।
इरानले बाहिरी रूपमा कडा रूप देखाए पनि ट्रम्पको दाबीले भने भित्रि परिस्थिति फरक रहेको देखाउँछ। अमेरिकी राष्ट्रपतिले इरानलाई ‘आफ्नै मान्छेबाट मारिने डर’ रहेको भन्दै गरेको टिप्पणी गरेका छन्। ट्रम्पको यो भनाइ यस्तो समयमा आएको छ जब पश्चिम एसियामा शक्ति संघर्ष र सैन्य तनाव उत्कर्षमा पुगेको छ।
