६ दिनमै ९०० करोड क्लबमा धुरन्धर २, एनिमलको रेकर्ड ध्वस्त

मुम्बई । बलिउड अभिनेता रणवीर सिंहको पछिल्लो फिल्म धुरन्धर २ ले बक्स अफिसमा सुनामी ल्याएको छ। रिलिजको छैटौँ दिन मंगलबारसम्म यस फिल्मले विश्वभर ९१९ करोड भारुको आँकडा पार गर्दै ऐतिहासिक सफलता हात पारेको हो।

धुरन्धर २ ले कयौँ ठुला ब्लकबस्टर फिल्मको लाइफटाइम कलेक्सनलाई उछिनेको छ। यसले आमिर खानको सेक्रेट सुपरस्टार (९१२.७५ करोड) र रणवीर कपूरको एनिमल (९१५ करोड) को कुल कमाईलाई पछि पारेको हो। छैटौँ दिन फिल्मको हिन्दी भर्सनले मात्र ५२ करोडको व्यापार गरेको छ भने तेलुगु, तामिल र मलयालम भाषामा पनि राम्रो प्रभाव जमाएको छ।

यसअघि फिल्मको पहिलो भाग धुरन्धरले विश्वभर १३०७ करोड कमाएर तहल्का मच्चाएको थियो। भारतमा मात्रै ८४० करोड नेट कलेक्सन गरेर यो हिन्दी भाषाकै सबैभन्दा धेरै कमाउने फिल्म बनेको थियो। अमेरिका र क्यानडा जस्ता वैदेशिक बजारमा समेत यसले बाहुबली २ को रेकर्ड तोडेको थियो।

खाडी मुलुकहरूमा रिलिजको अनुमति नपाउँदा र ए रेटेड फिल्म हुँदाहुँदै पनि धुरन्धर सिरिजले भारतीय सिनेमामा नयाँ मानक स्थापित गरेको छ। अहिलेको रफ्तार हेर्दा धुरन्धर २ ले छिट्टै १ हजार करोडको क्लबमा प्रवेश गर्ने निश्चित देखिएको छ।