ग्यास फिल्डमा आक्रमणपछि ब्यारेलकै ११० डलरमा उक्लियो कच्चा तेल

हङकङ । विश्व बजारमा बिहिबार कच्चा तेलको भाउ बढेको छ । विश्वकै सबैभन्दा ठुलो प्राकृतिक ग्यास क्षेत्रमा आक्रमण भएको खबर बाहिर आयपछि तेलको भाउ उकालो लागेको हो । उक्त घटनापछि तेलको अन्तर्राष्ट्रिय बेञ्चमार्क ब्रेन्ट क्रुडको मूल्य प्रति ब्यारेल ११२ डलरसम्म पुगेको छ, जुन अघिल्लो दिनको तुलनामा पाँच प्रतिशतभन्दा बढी हो । यद्यपि केही समयपछि मूल्य अलि घटेर स्थिर हुन खोजेको देखिन्छ ।

कतारको आन्तरिक मन्त्रालयका अनुसार उक्त क्षेत्रमा भएको आगलागीलाई नियन्त्रणमा ल्याइएको छ । हालसम्म कुनै मानवीय क्षति भएको छैन । कतारको सरकारी ऊर्जा कम्पनीले भने संरचनागत क्षति व्यापक रहेको जनाएको छ । ऊर्जा आपूर्तिको हिसाबले अत्यन्त संवेदनशील मानिने यस क्षेत्रमा आक्रमण भएपछि तेल बजारमा त्रास फैलिएको छ ।

यसैबिच इरानले आफ्नो ऊर्जा पूर्वाधारमा भएको आक्रमणप्रति कडा प्रतिक्रिया जनाउँदै निर्णायक प्रतिकार गर्ने चेतावनी दिएको छ । इरानी सेनाले जारी गरेको वक्तव्यमा ऊर्जा, इन्धन र आर्थिक संरचनामाथि आक्रमण भए त्यसको स्रोतलाई नै निशाना बनाइने स्पष्ट उल्लेख गरिएको छ । यद्यपि तेल र ग्यासको मूल्यमा आएको यो उछाल अघिल्लो हप्तामा देखिएको स्तरभन्दा तलै छ । मार्च ९ मा तेलको मूल्य प्रतिब्यारेल ११६ डलर ७८ सेन्टसम्म पुगेको थियो ।