फेरि रोमान्टिक अवतारमा देखिँदै शाहरुख खान

मुम्बई । बलिउडका ‘किङ खान’ शाहरुख खानले एक पटक पुनः ठुलो पर्दामा रोमान्सको जादु छर्ने भएका छन् । ‘पठान’ र ‘जवान’ जस्ता ब्लकबस्टर एक्सन फिल्महरू मार्फत बक्स अफिसमा तहल्का पिटेका उनी अब आफ्नो पुरानो र चर्चित रोमान्टिक अन्दाजमा फर्कन लागेका हुन् ।

पिंकभिलाको रिपोर्ट अनुसार यो फिल्म एक क्लासिक प्रेमकथामा आधारित हुनेछ । जसमा भावना र पुरानो युगको प्रेमको अनुभूतिलाई आधुनिक शैलीमा प्रस्तुत गरिनेछ । निर्माण पक्षले यो प्रोजेक्टलाई अन्तर्राष्ट्रिय स्तरको बनाउने र भव्य रूपमा प्रस्तुत गर्ने योजना बनाएको छ ।

शाहरुख खान यस फिल्ममा एक परिपक्व भूमिकामा देखिनेछन् । उनको यो अवतारले दर्शकलाई ‘दिलवाले दुल्हनिया ले जाएंगे’, ‘कुछ कुछ होता है’ र ‘वीर–जारा’ जस्ता सदाबहार फिल्महरूको याद दिलाउनेछ । लामो समयसम्म एक्सन भूमिकामा देखिएका शाहरुखलाई फेरि रोमान्टिक भूमिकामा हेर्न फ्यानहरू निकै उत्सुक छन् ।

फिल्मको कथा, निर्देशक र अन्य कलाकारहरूको बारेमा अहिले नै धेरै जानकारी सार्वजनिक गरिएको छैन । यद्यपि, फिल्म उद्योगमा यस प्रोजेक्टलाई लिएर निकै चर्चा सुरु भइसकेको छ ।