इजरायली आक्रमणमा बेरुतमा ६ जनाको मृत्यु

बेरुत । बेरुतमा इजरायलले गरेको हवाई आक्रमणमा कम्तीमा ६ जनाको मृत्यु भएको छ । अरू २४ जना घाइते भएका छन् । लेबनानको जनस्वास्थ्य मन्त्रालयले सार्वजनिक गरेको प्रारम्भिक विवरणअनुसार मृतकहरूको पहिचान अझै खुल्न बाँकी छ । डीएनए परीक्षणपछि मात्र पहिचान पुष्टि गरिने जनाइएको छ ।

इजरायली रक्षा बल (आईडीएफ) हेजबुल्लाहका लक्ष्यहरूलाई निशाना बनाउँदै आक्रमण गरेको बताइएको छ । स्थानीय सञ्चारमाध्यमका अनुसार पहिलो आक्रमण राजधानीको केन्द्रमा पर्ने जुकाक अल–ब्लाट क्षेत्रमा रहेको एउटा आवासीय भवनमा परेको थियो, जुन सरकारी मुख्यालय र विभिन्न दूतावासहरू नजिकै पर्छ ।

त्यसैगरी दोस्रो आक्रमण वास्ता क्षेत्रमा गरिएको थियो । घटनाको पुष्टि समाचार एजेन्सी एएफपीले पनि गरेको छ । मध्यपूर्वमा चर्कँदै गएको द्वन्द्वबिच लेबनान प्रत्यक्ष युद्धमा तानिएको छ । 

गत मार्च २ मा हेजबुल्लाले इजरायलतर्फ रकेट प्रहार गरेपछि अवस्था झन् तनावपूर्ण बनेको छ । अमेरिका र इजरायलको संयुक्त कारबाहीमा इरानका सर्वोच्च नेता आयतुल्ला अली खामेनी मारिएको दाबीको प्रतिक्रिया स्वरूप उक्त आक्रमण गरिएको थियो ।