यूएईस्थित अस्ट्रेलियाली सैन्य अखडामा इरानी क्षेप्यास्त्र प्रहार
दुबई । इरान र इजरायलबिचको द्वन्द्व चर्किएसँगै संयुक्त अरब इमिरेट्स (यूएई) मा रहेको अस्ट्रेलियाली सैन्य अखडामा इरानी क्षेप्यास्त्र खसेको छ। अस्ट्रेलियाका प्रधानमन्त्री एन्थोनी अल्बानिजले आज बिहान यूएईको अल मिन्हादस्थित अस्ट्रेलियाली सैन्य आधार शिविरमा इरानी क्षेप्यास्त्र प्रहार भएको आधिकारिक पुष्टि गरेका छन्।
क्षेप्यास्त्र सैन्य अखडा जाने सडकमा खसेका कारण त्यहाँ सानो आगलागी भएको र त्यसबाट नजिकैको आवास गृह तथा उपचार केन्द्रमा सामान्य क्षति पुगेको उनले बताए। इरानले आफ्ना सुरक्षा प्रमुख अली लारीजानीको हत्याको बदला लिन इजरायलमाथि क्षेप्यास्त्र प्रहार गरेको दाबी गरिरहँदा छिमेकी देशमा रहेको विदेशी सैन्य अखडामा समेत यसको असर देखिनुले क्षेत्रीय सुरक्षामा नयाँ चुनौती थपेको छ।
यो घटनापछि पश्चिम एसियामा रहेका अन्य विदेशी सैन्य आधार शिविरहरूमा पनि सतर्कता बढाइएको छ।
