इरानका उच्च सुरक्षा अधिकारी इजरायलको निशानामा

काठमाडौँ । इजरायलले सोमबार राति इरानको सर्वोच्च राष्ट्रिय सुरक्षा परिषद्का सचिव अली लारिजानीलाई निशाना बनाउँदै तेहरानमा हवाई हमला गरेको छ ।

मङ्गलबार बिहान आईडीएफका प्रमुख लेफ्टिनेन्ट जनरल इयाल जमिरले भने, ‘हामीले हिजो राति इरानमा महत्त्वपूर्ण उपलब्धि हासिल गरेका छौँ ।’ सोमबार साँझ आईडीएफले तेहरान, शिराज र तब्रिजमा एकसाथ शृङ्खलाबद्ध रुपमा आक्रमण गरेको बताइएको छ । 

यस आक्रमणमा लारीजानीलाई लक्षित गरेको कुनै औपचारिक घोषणा नभए पनि इरानको मिसाइल उत्पादन स्थल र कमाण्ड सेन्टरहरूलाई लक्ष्य बनाइएको भने सेनाले बताएको छ ।

जामिरका अनुसार सैनिक क्षमता र औद्योगिक उत्पादन क्षमताको क्षति र कमजोर पार्ने प्रक्रियासँगै, हामी रिभोलुशनरी गाड्र्स र शासनको दमन प्रणालीसँग सम्बन्धित तत्त्वहरूमाथि पनि कारबाही गरिनेछ । 

इजरायलले केही दिनअघि गाजामा इरान समर्थित सशस्त्र समूह प्यालेष्टिनी इस्लामिक जिहादका वरिष्ठ नेताहरूलाई निशाना बनाएर पनि आक्रमण गरेको थियो ।