‘निर्वाचित जनप्रतिनिधिले वाचा कार्यान्वयनका लागि तयार हुनुपर्छ’
कैलाली । सुदूरपश्चिम प्रदेशका मुख्यमन्त्री कमलबहादुर शाहले राष्ट्रिय स्वतन्त्र पार्टी (रास्वपा)का जनप्रतिनिधिले निर्वाचनका बेला गरेका वाचा कार्यान्वयन गर्न तयार हुनुपर्ने बताएका छन् ।
युवा विदेश पलायन भइरहेका विषयमा चिन्ता व्यक्त गर्दै उनले भने, “हिजो प्रश्न गर्ने ठाउँमा रहेका नेताहरू अहिले उत्तर दिने ठाउँमा पुगेका छन् । अब बोलेका कुरा व्यवहारमा लागू गर्नुपर्छ ।”
मुख्यमन्त्री शाहले मुलुक स्थिर सरकारतर्फ अघि बढिरहेको बताउँदै अब देश विकास र समृद्धिको बाटोमा अघि बढ्ने विश्वास व्यक्त गरे । कार्यक्रममा सामाजिक विकासमन्त्री मेघराज खड्काले आगामी सङ्घीय सरकारलाई शुभकामना दिँदै पाँच वर्ष स्थिर रूपमा काम गर्न आग्रह गरे । कैलाली क्षेत्र नं ३ मा रास्वपाबाट नवनिर्वाचित सांसद जगत जोशीले शिक्षामा परिवर्तन नगरी समाज परिवर्तन सम्भव नहुने भन्दै मुलुकमा नैतिक शिक्षाको आवश्यकता रहेको बताए ।
घोडाघोडी नगरपालिकाका प्रमुख खड्क रावतले तीनै तहका सरकारबीच समन्वय भए घोडाघोडीको विकास सम्भव हुने र यस क्षेत्रलाई शिक्षाको केन्द्र बनाउनु सकिने बताए । प्रदेश नीति तथा योजना आयोगका उपाध्यक्ष डा जीवन रानाले शिक्षाको सुधारका लागि आयोग सधैं साथमा रहने बताए ।
घोडाघोडी बहुमुखी क्याम्पसका अध्यक्ष लक्ष्मण न्युरेले प्रदेश सरकारको सहयोगले शिक्षाको विकासमा ठूलो टेवा पुगेको बताए । क्याम्पस प्रमुख लक्ष्मीप्रसाद भट्टराईले मुख्यमन्त्री शाहलाई ज्ञापनपत्र बुझाउँदै थप सहयोगको अपेक्षासहित धन्यवाद ज्ञापन गरे ।
कार्यक्रममा घोडाघोडी सामुदायिक माध्यमिक विद्यालयका अध्यक्ष विष्णु सापकोटाले प्राविधिक शिक्षालाई जोड दिँदै नमुना सामुदायिक विद्यालयको नीति लिएर अघि बढ्ने बताए । प्रदेश सरकारको करिब रु १० करोड बजेटमा निर्माण हुन लागेको घोडाघोडी सामुदायिक माध्यमिक विद्यालयको भवन तीन चरणमा निर्माण सम्पन्न गरिने बताइएको छ ।
