चीनद्वारा दुई परीक्षण उपग्रह अन्तरिक्षमा प्रक्षेपण

बेइजिङ । चीनले पृथ्वी अवलोकनसम्बन्धी प्रविधिको परीक्षणका लागि दुई वटा नयाँ परीक्षण उपग्रह अन्तरिक्षमा सफलतापूर्वक प्रक्षेपण गरेको छ । दक्षिण–पश्चिम चीनको सिचुआन प्रान्तमा रहेको सिछाङ उपग्रह प्रक्षेपण केन्द्रबाट शुक्रबार बिहान उक्त उपग्रहहरू प्रक्षेपण गरिएको हो ।

प्रक्षेपित उपग्रहहरू परीक्षण प्रकृतिका हुन् र मुख्य रूपमा पृथ्वी अवलोकनसम्बन्धी प्रविधिको परीक्षण तथा प्रमाणीकरणका लागि प्रयोग गरिने जनाइएको छ । वैज्ञानिकहरूले यसबाट विभिन्न अन्तरिक्ष प्रविधि, उपकरण र प्रणालीहरूको कार्यक्षमता परीक्षण गर्ने अपेक्षा गरेका छन् ।

यस प्रकारका उपग्रहहरूले पृथ्वीको सतह, वातावरण तथा अन्य प्राकृतिक अवस्थाबारे महत्वपूर्ण जानकारी सङ्कलन गर्न सहयोग पुयाउँछन् । प्राप्त तथ्यांक भविष्यमा वैज्ञानिक अनुसन्धान, मौसम अध्ययन, विपद् व्यवस्थापन तथा अन्य अन्तरिक्ष प्रविधिको विकासमा उपयोगी हुन सक्छ ।

यस प्रक्षेपणसँगै लङ मार्च रकेट शृङ्खलाको ६३२ औँ उडान अभियान सफलतापूर्वक सम्पन्न भएको छ। चीनले पछिल्ला वर्षहरूमा आफ्नो अन्तरिक्ष कार्यक्रमलाई तीव्र रूपमा अघि बढाइरहेको छ र विभिन्न वैज्ञानिक तथा प्राविधिक प्रयोगका लागि नियमित रूपमा उपग्रह प्रक्षेपण गर्दै आएको छ ।