होर्मुज जलडमरूनजिक एकैदिन तीन जलयान निशानामा

काठमाडौँ । इरानसँगको युद्धकाबिच विश्वकै महत्वपूर्ण तेल ढुवानी मार्ग होर्मुज जलडमरूनजिक बुधबार फेरि जहाजमाथि आक्रमण भएको छ । यससँगै बुधबार बिहान मात्रै तीन वटा जलयान प्रक्षेप्य हतियारको निशानामा परेका छन् । 

यसअघि बुधबार नै अर्काे मालवाहक जहाज ओमानको मुसन्दम प्रायद्वीपको उत्तरतर्फ करिब ११ नटिकल माइल क्षेत्रमा प्रहार भएपछि आगलागी भएको थियो । सो जहाजमा आगो लागेपछि चालकदललाई सुरक्षित स्थानमा सार्ने काम गरिएको बताइएको छ । त्यस्तै, संयुक्त अरब इमिरेट्सको तट नजिक रहेको अर्काे कार्गो जहाज बिहानै निशानामा परेर क्षतिग्रस्त भएको खबर आएको थियो ।

यूकेएमटीओका अनुसार अमेरिका–इजरायल र इरानबीच युद्ध सुरु भएयता कम्तीमा १३ वटा जहाजमाथि आक्रमण भइसकेको छ । विश्वको करिब २० प्रतिशत तेल ढुवानी हुने होर्मुज जलडमरू क्षेत्रमा बढ्दो असुरक्षाले अन्तर्राष्ट्रिय व्यापार र ऊर्जा आपूर्तिमा चिन्ता थपिएको छ ।