कतारमा अमेरिकी दूतावास नजिकका बासिन्दालाई सुरक्षित स्थानमा सार्न थालियो

दोहा । कतारले राजधानी दोहास्थित अमेरिकी दूतावास वरिपरि बसोबास गर्ने बासिन्दाहरूलाई अस्थायी रूपमा अन्यत्र सार्न थालेको छ । कतारको आन्तरिक मन्त्रालयका अनुसार यो कदम सावधानी स्वरूप अपनाइएको हो । मन्त्रालयले सामाजिक सञ्जाल एक्समा जारी गरेको वक्तव्यमा ती बासिन्दाका लागि उपयुक्त आवासको व्यवस्था गरिएको र आवश्यक रोकथामात्मक उपायका रूपमा स्थानान्तरण गरिएको जनाएको छ ।

यो निर्णय यससाता साउदी अरेबिया र कुवेतस्थित अमेरिकी दूतावास तथा दुबईस्थित अमेरिकी वाणिज्य दूतावासमा ड्रोन आक्रमण भएपछि आएको हो । यसैबिच अमेरिकी विदेश मन्त्रालयले मध्यपूर्वमा रहेका आफ्ना नागरिकलाई तत्काल क्षेत्र छाड्न चेतावनी दिएको छ । साे क्षेत्रका धेरै उडानहरू रद्द वा स्थगित भएका छन् ।

अमेरिकी सरकारले संयुक्त अरब इमिरेट्स, साउदी अरेबिया र जोर्डनमा रहेका नागरिकलाई फर्काउन चार्टर उडानको व्यवस्था गर्न प्रयास गरिरहेको छ । 

अन्य स्थानमा अलपत्र परेकाहरूलाई व्यावसायिक उडानको टिकट बुक गर्न पनि सहयोग गरिँदैछ । अमेरिकी विदेश मन्त्रालयका एक अधिकारीका अनुसार फेब्रुअरी २८ देखि हालसम्म करिब १७ हजार ५०० अमेरिकी नागरिक मध्यपूर्वबाट फर्किसकेका छन् ।