खानी क्षेत्र विकासमा सहकार्य गर्न भेनेजुएला र अमेरिका तयार

कारकास । भेनेजुएलाकी अन्तरिम राष्ट्रपति डेल्सी रोड्रिगेज र अमेरिकी आन्तरिक मन्त्री डग बर्गमले भेनेजुएलाको खानी क्षेत्र विकासका लागि दुई देशले सहकार्य गर्ने बताएका छन् । बर्गमले राजधानी काराकासस्थित राष्ट्रपति भवनमा रोड्रिगेजसँग भेट गरेका थिए । जनवरीमा अमेरिकी कारबाहीपछि पूर्वराष्ट्रपति निकोलास मादुरो पक्राउ परेपछि कुनै अमेरिकी मन्त्रीको भेनेजुएला भ्रमण गरेको यो दोस्रो पटक हो ।

भेनेजुएला विश्वकै सबैभन्दा ठूलो प्रमाणित तेल भण्डार भएको देशमध्ये एक हो र यहाँ सुन, हीरा तथा मोबाइल फोन र विद्युतीय सवारीसाधनमा प्रयोग हुने दुर्लभ खनिजहरू समेत प्रशस्त पाइन्छन् । अमेरिकाका प्रतिनिधिहरूसँगको भेटमा दुई दर्जनभन्दा बढी अमेरिकी खानी तथा खनिज कम्पनीका प्रतिनिधि पनि सहभागी भएका थिए, जसले अर्बौ डलर लगानी र हजारौँ रोजगारी सिर्जना हुन सक्ने बताइएको छ ।