इरानको जवाफी आक्रमणपछि इजरायलको अवस्था, तस्बिरहरू

जेरुसेलम । इरान, इजरायल र अमेरिकाबिचको सैन्य तनावले अब महायुद्धको रूप लिएको छ। सन् २०२५ जुनमा भएको १२ दिने युद्धपछि शान्त देखिएको मध्यपूर्व फेरि अशान्त बनेको हो। 

गत फेब्रुअरी २८ बाट इजरायल र अमेरिकाले इरानमाथि प्रतिबन्धात्मक हवाई आक्रमण सुरु गरेपछि इरान र उसका सहयोगी समूहहरूले ठुलो स्तरमा प्रत्याक्रमण सुरु गरेका छन्।

इरानले इजरायलका मुख्य जनघनत्व भएका क्षेत्र र सैन्य अखडाहरूलाई निशाना बनाउँदै सयौँ ब्यालिस्टिक मिसाइल र ड्रोन प्रहार गरेको छ। यस आक्रमणका कारण इजरायलको बेत शेमेश सहरमा रहेको एउटा आवासीय भवन र सिनेगगमा सिधै मिसाइल खस्दा कम्तीमा ९ जनाको ज्यान गएको छ। मार्च १ मा भएको यो हमला वर्तमान युद्धको सबैभन्दा घातक आक्रमण मानिएको छ।

इजरायलका मुख्य सहरहरू तेल अभिभ, जेरुसेलम, हाइफा र आइलाटमा लगातार साइरन बजिरहेका छन् भने आकाशमै मिसाइल इन्टरसेप्ट भइरहेका दृश्यहरू देखिएका छन्। इजरायलको प्रमुख अन्तर्राष्ट्रिय विमानस्थल बेन गुरियन नजिकै पनि मिसाइल खसेको रिपोर्टहरू आएका छन्, जसले हवाई सम्पर्कलाई पूर्ण रूपमा प्रभावित पारेको छ।

इरानले आफ्नो आक्रमण इजरायलमा मात्र सीमित नराखी खाडी क्षेत्रमा रहेका अमेरिकी सम्पत्ति र उसका सहयोगी राष्ट्रहरूमाथि पनि विस्तार गरेको छ। यसले गर्दा यो द्वन्द्वले क्षेत्रीय स्वरूप ग्रहण गरेको छ। अमेरिका र इजरायलले इरानको परमाणु क्षमता नष्ट गर्ने उद्देश्यले आक्रमण थालेको बताए पनि इरानको यो कडा प्रतिक्रियाले परिस्थिति झन् भयावह बनाएको छ।