अमेरिकी कन्सुलेट नजिक हिंसात्मक झडप, कम्तीमा ९ जनाको मृत्यु
काठमाडौँ । पाकिस्तानको कराँचीस्थित अमेरिकी महावाणिज्य दूतावास नजिक प्रहरीसँग भएको हिंसात्मक झडपपछि कम्तीमा ९ जनाको मृत्यु भएको छ ।
अमेरिका र इजरायलले इरानमाथि गरेको आक्रमणपछि कराँची, लाहोर र इस्लामाबादमा इरान समर्थक सयौँ प्रदर्शनकारी सडकमा उत्रिएका थिए । निजी उद्धार संस्था एदी फाउन्डेशनका एक अधिकारीले पनि ९ जनाको शव र दर्जनौँ घाइतेलाई अस्पताल पुर्याइएको पुष्टि गरेका छन् ।
प्रहरीले प्रदर्शनकारीलाई कन्सुलेट परिसर प्रवेश गर्नबाट रोक्ने प्रयास गरेपछि झडप सुरु भएको बताइएको छ । घटनाबारे प्रहरीले अझै औपचारिक बयान जारी गरेको छैन ।
यसैबिच संयुक्त राष्ट्रसंघका एक अधिकारीले पाकिस्तान प्रशासित गिलगित–बलिस्तानको गिलगितमा रहेको संयुक्त राष्ट्रसंघको एक कार्यालयमा आगजनी गरिएको बताएका छन् ।
सयौँ मानिस प्रदर्शनमा उत्रिएपछि उक्त क्षेत्रमा कफ्र्यु लगाइएको प्रहरीले पनि पुष्टि गरेको छ । शिया संगठनहरूले इस्लामाबादसहित विभिन्न सहरमा विरोध प्रदर्शनको घोषणा गरेका थिए ।
