थलापति विजयको वैवाहिक सम्बन्धमा दरार : श्रीमतीले हालिन् सम्बन्धविच्छेदको मुद्दा

हैदराबाद । दक्षिण भारतीय चलचित्रका सुपरस्टार तथा तमिलागा वेट्री काझागम (टीभीके) पार्टीका अध्यक्ष थलापति विजयको २५ वर्ष लामो वैवाहिक जीवन संकटमा परेको छ। विजयकी श्रीमती संगीता सोर्नालिंगमले चेन्नईको चेंगलपट्टु फेमिली कोर्टमा सम्बन्धविच्छेदका लागि निवेदन दायर गरेकी छन्। 

विजयको धोका सहन नसक्ने भन्दै उनले अब सँगै बस्न नसकिने उल्लेख गरेकी छन्। यसअघि सधैँ सार्वजनिक कार्यक्रमहरूमा सँगै देखिने यो जोडीको सम्बन्ध यसरी अदालतसम्म पुग्ला भन्ने धेरैले अनुमान गरेका थिएनन्। अदालतले यसलाई प्रक्रियामा रहेको मुद्दाको रूपमा दर्ता गरेको छ र अब दुवै पक्षको बहस सुनेर अगाडि बढ्ने बताएको छ।

विजय र संगीताको प्रेम कहानी कुनै चलचित्रको कथाभन्दा कम थिएन। सन् १९९० को दशकको अन्त्यतिर बेलायतमा बस्ने संगीता विजयको ठुलो फ्यान थिइन्। उनी विजयलाई भेट्नकै लागि चेन्नई पुगेर सुटिङ सेटमा पुगेकी थिइन्। 

उनीहरूको पहिलो भेटमै विजय संगीताको सादगीबाट प्रभावित भएका थिए। बिस्तारै सुरु भएको उनीहरूको मित्रता प्रेममा बदलियो र दुवै परिवारको सहमतिमा सन् १९९९ अगस्ट २५ मा उनीहरूले विवाह गरे। उनीहरूका दुई सन्तान छोरा जेसन संजय र छोरी दिव्या साशा छन्।

सिनेमा र व्यक्तिगत जीवन मात्र होइन, विजयको राजनीतिक करिअर र अन्तिम चलचित्र पनि अहिले विवाद र अन्योलको घेरामा परेको छ। ३३ वर्ष लामो फिल्मी यात्रापछि विजयले सन् २०२६ जनवरी ३० मा अभिनयबाट संन्यास लिएर पूर्णकालीन राजनीतिमा लाग्ने घोषणा गरेका थिए। 

उनको अन्तिम चलचित्र जन नायकन सन् २०२६ जनवरी ९ मा रिलिज हुने तय भए पनि सेन्सर बोर्डको झमेलाका कारण अझै प्रदर्शन हुन सकेको छैन। सेन्सर बोर्डले सर्टिफिकेट दिन अस्वीकार गरेपछि यो मामला अहिले मद्रास उच्च अदालतसम्म पुगेको छ। फिल्मको रिभाइजिङ कमिटीले समीक्षा गर्न बाँकी रहेकाले रिलिज मिति अझै अनिश्चित छ।