काठमाडौँ महानगरद्वारा ज्येष्ठ नागरिकको स्वास्थ्य सर्वेक्षण

वासिङ्टन डीसी । अमेरिकाका चर्चित नागरिक अधिकार अभियन्ता तथा पूर्वराष्ट्रपति पदका उम्मेदवार जेसी ज्याक्सनको ८४ वर्षको उमेरमा निधन भएको छ । उनकाे परिवारद्वारा जारी वक्तव्यअनुसार मंगलबार बिहान ज्याक्सनको निधन भएको हो । ज्याक्सनको मृत्युको कारण औपचारिक रूपमा सार्वजनिक नभए पनि उनी गत नोभेम्बरमा अस्पतालमा भर्ना भएका थिए । चिकित्सकहरूले उनलाई स्नायुसम्बन्धी जटिल रोग भएको बताएका थिए । 

यसअघि सन् २०१७ मा ज्याक्सनले आफू पार्किन्सन रोगबाट पीडित भएको बताएका थिए । यो रोगले मस्तिष्क र स्नायुतन्त्रमा असर गर्छ । स्वास्थ्य समस्या भए पनि उनले नागरिक अधिकारका मुद्दामा सक्रियता जारी राखेका थिए ।

सन् १९४१ अक्टोबर ८ मा साउथ क्यारोलिनाको ग्रिनभिलमा जन्मिएका ज्याक्सन सानैदेखि राजनीति र सामाजिक अभियानमा संलग्न थिए । सन् १९६० को दशकमा मार्टिन लुथर किङ जुनियरको एउटा सम्मेलनमा नेतृत्वदायी भूमिकामा रहेपछि उनी राष्ट्रिय रूपमा चर्चित बनेका थिए । 

ज्याक्सनले १९७१ मा अपरेसन पुस र त्यसको केही वर्षपछि नेशनल रेन्बो कोअलिशन स्थापना गरी सामाजिक न्यायका अभियान अघि बढाएका थिए ।  उनले सन् १९८४ र १९८८ मा डेमोक्रेटिक पार्टीबाट अमेरिकी राष्ट्रपति पदका लागि उम्मेदवारी दिएका थिए ।

जीवनको अन्तिम समयसम्म पनि उनले अमेरिकाभित्र तथा बाहिर सीमान्तकृत समुदायका अधिकारका लागि आवाज उठाइरहेका थिए ।