बंगलादेश : मंगलबार प्रधानमन्त्रीको शपथ लिँदै तारिक रहमान, नेपालसहित यी १३ देशलाई निम्तो

बंगलादेश नेशनल पार्टी (बीएनपी) नेता तारिक रहमानले मंगलबार साँझ प्रधानमन्त्रीको रूपमा शपथ लिने भएका छन्। नयाँ मन्त्रिपरिषद्को शपथ ग्रहण समारोहको तयारी तीव्र पारिएको छ। यसलाई प्रमुख कूटनीतिक कार्यक्रमको रूपमा हेरिएको छ। 

अन्तरिम सरकारका प्रमुख सल्लाहकार मुहम्मद युनुसले १३ देशका सरकार प्रमुखहरूलाई शपथ ग्रहण समारोहमा भाग लिन आमन्त्रित गरेका छन्। यो कदमलाई नयाँ बंगलादेश सरकारको विदेश नीति र क्षेत्रीय सन्तुलनको संकेतको रूपमा हेरिएको छ।

आमन्त्रित देशहरूमा नेपालसहित भारत, चीन, साउदी अरेबिया, पाकिस्तान, टर्की, संयुक्त अरब इमिरेट्स, कतार, मलेसिया, ब्रुनाई, श्रीलंका, माल्दिभ्स र भुटान रहेका छन्। दक्षिण एसियादेखि पश्चिम एसियासम्मका देशहरूको भेलाले कार्यक्रमलाई कूटनीतिक रूपमा महत्त्वपूर्ण बनाएको छ।

ढाकामा हुने यो समारोहलाई केवल औपचारिक कार्यक्रम मात्र नभई नयाँ सरकारको अन्तर्राष्ट्रिय सन्देशको रूपमा हेरिएको छ। विशेष गरी भारत, पाकिस्तान र चीनलाई निमन्त्रणा गरेर क्षेत्रीय सन्तुलन कायम राख्ने प्रयास गरिएको छ।

नयाँ मन्त्रिपरिषद्सँगै शपथ लिन लागेका तारिक रहमानले घरेलु राजनीतिलाई स्थिर बनाउने, अर्थतन्त्रलाई ट्रयाकमा ल्याउने र अन्तर्राष्ट्रिय सम्बन्धमा सन्तुलन कायम राख्ने ठूलो चुनौतीको सामना गर्नुपर्नेछ।

हालै भएको चुनावमा बीएनपी गठबन्धनले २१२ सिट जित्यो भने जमात-ए-इस्लामी गठबन्धनले ७७ सिट जित्यो। कुल २९९ सिटमा प्रतिस्पर्धा भएको थियो।

तारिक रहमान को हुन्?
६० वर्षीय तारिक रहमान प्रभावशाली जिया परिवारबाट आएका हुन्, जसले दशकौंसम्म बंगलादेशी राजनीतिमा प्रभुत्व जमाएको थियो। उनका आमाबाबु दुवैले देशमा शीर्ष नेताको रूपमा सेवा गरेका थिए। यद्यपि, उनको राजनीतिक यात्रा सजिलो थिएन। उनले नातावाद र भ्रष्टाचारका आरोप खेप्नुपरेको थियो।  

उनका बुबा जियाउर रहमानको हत्या गरिएको थियो। तारिकले भ्रष्टाचारको आरोपमा पूर्व प्रधानमन्त्री शेख हसिनाको सरकारमा १८ महिना जेल जीवन बिताएका थिए। उपचारका लागि बेलायत गएका उनी १७ वर्ष निर्वासनमा रहेका थिए। 

हसिनाको सरकार सन् २०२४ को विद्यार्थी आन्दोलनपछि सत्ताच्युत भएको थियो। उनी अहिले भारतमा निर्वासित छिन्। बिहीबार सम्पन्न निर्वाचनमा अवामी लिगमाथि प्रतिबन्ध लगाइएको थियो।  यसबिच चुनाव भयो र उनको पार्टीले बहुमत हासिल गर्‍यो।  

उनकी आमा खालिदा जिया देशकी पहिलो महिला प्रधानमन्त्री थिइन्। उनको मृत्यु भएको केही हप्तापछि तारिकलाई बीएनपीको प्रमुख नियुक्त गरिएको थियो। रहमानले ३५ वर्षको उमेरदेखि नै सन् २००१ मा बीएनपीमा सक्रिय भूमिका खेल्न थालेका थिए। खालिदा जियाले पहिलो पटक सन् १९९१ देखि १९९६ सम्म प्रधानमन्त्रीको रूपमा सेवा गरेकी थिइन्। 

तारिकका बुबा जियाउर रहमान सेना प्रमुख हुँदै राष्ट्रपतिसम्म पुगेका थिए। सन् १९८१ मा सैन्य विद्रोहको क्रममा उनको हत्या गरिएको थियो। उनी बंगलादेशको स्वतन्त्रता आन्दोलनका प्रमुख नेतामध्ये एक थिए र सन् १९७८ मा बीएनपी स्थापना गरेका थिए।