बङ्गलादेशमा बीएनपीको स्पष्ट अग्रता, दुई तिहाइ बहुमत नजिक
काठमाडौँ । बङ्गलादेशको राष्ट्रिय निर्वाचनमा बङ्गलादेश नेशनलिस्ट पार्टी (बीएनपी)ले स्पष्ट अग्रता बनाउँदै सत्ता फर्किने सङ्केत देखाएको छ । निर्वाचन आयोग र पार्टीको विवरणअनुसार हालसम्म घोषणा भएका २९६ निर्वाचन क्षेत्रमध्ये बीएनपी र उसका गठबन्धन दलहरूले २१३ क्षेत्रमा जीत हात पारेका छन् ।
बीएनपीका अध्यक्ष तारिक रहमान ढाका–१७ र बोगुरा–६ बाट अनौपचारिक रूपमा विजयी घोषित भएका छन् । लामो समय बेलायत निर्वासनपछि फर्किएका उनले ढाका–१७ मा उल्लेखनीय मत अन्तरले जीत हात पारेका छन्।
पार्टीका महासचिव मिर्जा फखरुल इस्लाम आलमगिर ठाकुरगाउँ–१ बाट विजयी भएका छन् । यसैबिच जमात–ए–इस्लामीले पनि ७६ सिटमा जीत हात पारको छ ।
इस्लामी आन्दोलन बङ्गलादेशले भने एक सिट मात्रै जितेको छ । यो समाचार तयार पार्दासम्म तीन सिटको नतिजा आउन बाँकी छ । यस निर्वाचनमा पहिलो पटक संसदीय चुनावसँगै संवैधानिक सुधारसम्बन्धी जनमत सङ्ग्रह पनि एकै पटक सम्पन्न गरिएको छ । यसलाई बङ्गलादेशको लोकतान्त्रिक सङ्क्रमणका लागि महत्त्वपूर्ण मोडका रूपमा हेरिएको छ ।
