एप्स्टिन फाइलमा बिल गेट्सको नाम जोडिएपछि मेलिन्डाले के भनिन् ?

वासिङ्टन डीसी । आफ्ना पूर्वपति बिल गेट्सको नाम यौन दूराचारी जेफ्री एप्स्टिनसँग सम्बन्धित नयाँ फाइलमा जोडिएपछि अमेरिकी अर्बपति व्यापारी तथा समाजसेवी मेलिन्डा फ्रेन्च गेट्सले प्रतिक्रिया दिएकी छिन् ।

‘म अहिले त्यो सबै फोहोरबाट टाढा भएकी छु, त्यसमा म खुसी छु,’ उनले भनिन् । गेट्स दम्पतीले २७ वर्षको वैवाहिक सम्बन्धलाई सन् २०२१ मा अन्त्य गरेका थिए ।

अमेरिकी न्याय मन्त्रालयले हालै सार्वजनिक गरेका ३० लाखभन्दा बढी दस्ताबेजमा एप्स्टिनले बिल गेट्सबारे गरेका दाबीहरू पनि समावेश छन् । यसमा गेट्सलाई यौनरोग लागेको आरोप पनि छ । ती दाबी पूरै झुटा र निरर्थक भन्दै बिल गेट्सका प्रवक्ताले खारेज गरेका छन् ।

एप्स्टिनका कुनै पीडितले गेट्समाथि प्रत्यक्ष आरोप भने लगाएका छैनन् र फाइलमा नाम देखिनु आफैँमा अपराधको प्रमाण होइन । रिपोर्टहरूका अनुसार मेलिन्डा गेट्स एप्स्टिनसँगको सम्पर्कलाई लिएर असन्तुष्ट थिइन् । सम्बन्ध विच्छेदपछि बिल गेट्सले सन् २०१९ मा माइक्रोसफ्टकी एक कर्मचारीसँग सम्बन्ध रहेको स्वीकार गरेका थिए ।

फाइलमा सन् २०१३ को जुलाई १८ का दुई वटा इमेल पनि छन् । यी इमेल एप्स्टिनको खाताबाट पठाइएका देखिन्छन् । तर यसमा गेट्सको कुनै इमेल ठेगाना जोडिएको छैन । ती इमेलमा गेट्सले यौन सम्बन्धपछि औषधि लिनुपरेको दाबी गरिएको छ । यो दाबीलाई गेट्सका प्रतिनिधिले उनलाई बदनाम गर्ने प्रयास गरेको आरोप लगाएका छन् ।

बिल गेट्सले विगतमा एप्स्टिनसँग केही डिनरमा मात्रै भेट गरेको र ती भेट पनि  परोपकारी परियोजनाका लागि भएको बताइएको छ । एप्स्टिनलाई १४ वर्षीया किशोरीसँग यौन शोषणको अभियोग लागेको थियो र २०१९ मा उनी न्युयोर्क जेलमा मृत भेटिएका थिए ।

नयाँ फाइलहरूले एप्स्टिनको व्यापक प्रभाव र शक्तिशाली व्यक्तिहरूसँगको सम्पर्कलाई फेरि उजागर गरेका छन् ।