जलवायु कार्यमा नेपालको ऐतिहासिक जित, बिल्ड अप नेपाललाई १ मिलियन डलरको विश्वस्तरीय सम्मान

जलवायु परिवर्तनविरुद्धको विश्वव्यापी प्रयासमा नेपालले ऐतिहासिक उपलब्धि हासिल गरेको छ। दिगो तथा जलवायुमैत्री निर्माण क्षेत्रमा काम गर्दै आएको संस्था बिल्ड अप नेपाल ले सन् २०२६ को प्रतिष्ठित जायद सस्टेनेबिलिटी पुरस्कार जलवायु कार्य विधामा प्राप्त गरेको छ।

अबुधाबीमा आयोजित विशेष समारोहमा संयुक्त अरब इमिरेट्सका राष्ट्रपति शेख मोहम्मद बिन जायेद अल नाह्यानद्वारा उक्त पुरस्कार प्रदान गरिएको हो।

अबुधाबी सस्टेनेबिलिटी सप्ताहको उद्घाटन अवसरमा आयोजित कार्यक्रममा विश्वभरबाट छनोट भएका संस्थामध्ये बिल्ड अप नेपाल जलवायु कार्य विधामा सम्मानित भएको हो। पुरस्कारको राशि १ मिलियन अमेरिकी डलर, अर्थात् झन्डै साढे १४ करोड नेपाली रुपैयाँ रहेको छ।

सन् २००८ मा स्थापना भएको जायद सस्टेनेबिलिटी पुरस्कार यूएईको सबैभन्दा प्रतिष्ठित अन्तर्राष्ट्रिय पुरस्कारमध्ये एक मानिन्छ।

संस्थाको योगदान

बिल्ड अप नेपालले कम कार्बन, भूकम्प प्रतिरोधी र वातावरणमैत्री इको-ब्रिक्स प्रविधिमार्फत नेपालका भूकम्पीय जोखिमयुक्त क्षेत्रहरूमा सुरक्षित आवास निर्माण गर्दै आएको छ।

संस्थाका अनुसार हालसम्म

• ३३ लाखभन्दा बढी इको-ब्रिक्स उत्पादन
• १२ हजारभन्दा बढी सुरक्षित घर निर्माण
• २ हजार हरित रोजगारी सिर्जना
• एक लाख १० हजार टनभन्दा बढी कार्बन उत्सर्जन न्यूनीकरण गर्न सफल भएको छ।

विशेषगरी जाजरकोट, पश्चिम रुकुमलगायत क्षेत्रमा यस प्रविधिले कम लागतमा सुरक्षित आवास निर्माणमा महत्वपूर्ण योगदान पुर्‍याएको छ।

समारोह विवरण

पुरस्कार वितरण समारोहमा यूएईका लागि नेपाली राजदूत तेजबहादुर क्षेत्रीको उपस्थिति रहेको थियो। पुरस्कार बिल्ड अप नेपालका प्रबन्ध निर्देशक ब्योर्न सोडरबर्गले ग्रहण गरेका हुन्।

यस वर्ष स्वास्थ्य, खाद्य, ऊर्जा, पानी, जलवायु कार्य तथा विद्यालय परियोजना गरी कुल ६ विधामा पुरस्कार प्रदान गरिएको थियो। जलवायु कार्य विधामा प्राप्त यो अन्तर्राष्ट्रिय सम्मानले नेपालको दिगो विकास र वातावरण संरक्षणको प्रयासलाई विश्वस्तरमा चिनाएको छ।

बिल्ड अप नेपालको यो उपलब्धिलाई नेपाली दूतावासले नेपालको अन्तर्राष्ट्रिय पहिचान थप बलियो बनाउने उपलब्धि भन्दै स्वागत गरेको छ।