भारतीय थिएटरकी सक्रिय कलाकार अदिति मुखर्जीको सडक दुर्घटनामा मृत्यु
नोएडा। भारतीय थिएटर क्षेत्रमा प्रतिभावान् मानिएकी कलाकार अदिति मुखर्जीको नोएडा एक्सप्रेसवेमा भएको भिषण सडक दुर्घटनामा निधन भएको छ ।आइतबार सफीपुर गाउँ नजिकै यो दर्दनाक दुर्घटना भएको हो, उनी ग्रेटर नोएडाको गौतम बुद्ध युनिभर्सिटीमा एक कार्यक्रमका लागि बाइकमा जाँदै थिइन् ।
सफीपुर गाउँ नजिकै एक अज्ञात सवारीसाधनले उनको बाइकलाई तीव्र गतिमा ठक्कर दिएको थियो । गम्भीर घाइते अदितिलाई तत्काल शारदा अस्पताल लगिए पनि बचाउन नसकिएको भारतीय सञ्चारमाध्यमले लेखेको छ । उनको निधनको खबरले भारतको थिएटर जगतमा गहिरो शोक छाएको छ ।
प्रख्यात रंगमञ्च निर्देशक अरविन्द गौरले अदितिको निधनमा गहिरो समवेदना व्यक्त गरेका छन् । उनले भने, ‘अदिति एक प्रतिभाशाली, ऊर्जावान र उत्साही अभिनेत्री थिइन् । उनी अस्मिता थिएटरको २०२२ ब्याचकी सक्रिय अभिनेत्री थिइन् । उनको निधन हामी सबैका लागि अत्यन्तै पीडादायक घटना हो ।’
