रुसको विशाल तेल प्रशोधन केन्द्रमा युक्रेनी ड्रोन हमला, मिसाइल क्षमता घटाएको दाबी

काठमाडौँ, कार्तिक ३०। युक्रेनी सेनाले रुसको मस्को नजिकै रियाजान क्षेत्रको तेल प्रशोधन केन्द्रमा ड्रोन आक्रमण गरेको छ। यसले आगो बलिरहेको र उत्पादनमा क्षति पुगेको जनाएको छ।

युक्रेनी सेनाले सामाजिक सञ्जालमा जारी विज्ञप्तिमा भनेको छ, ‘युक्रेनले शत्रुको मिसाइल र बम प्रहार गर्ने क्षमतालाई कम गर्ने प्रयासस्वरूप मस्को नजिकैको रियाजान क्षेत्रमा रहेको तेल प्रशोधन केन्द्रमा आक्रमण गरेको छ।’

रियाजानका गभर्नर पावेल माल्कोभले रुसी हवाई प्रतिरक्षाले रातमा २५ युक्रेनी ड्रोन खसालेको बताए। उनले टेलिग्राममा भनेका छन्, ‘भग्नावशेष खस्दा एउटा उद्यमको परिसरमा आगलागी भएको छ।’

यो आक्रमण युक्रेनको राजधानी किभमा रुसले गरेको आक्रमणको एक दिनपछि भएको हो। त्यस आक्रमणमा सात जनाको मृत्यु भएको थियो।

किभको सहरी प्रशासनका प्रमुख तैमुर ताकाचेन्कोले सामाजिक सञ्जालमा लेखेका छन्, ‘नोभेम्बर १४ मा भएको गोलाबारीमा घाइते भएकी एक वृद्धाको आज बिहान अस्पतालमा मृत्यु भएको छ।’ अन्य पीडितमा ७० को दशकका एक जोडी र ६२ वर्षीय एक व्यक्ति थिए।

यसैबीच, मध्य निप्रो क्षेत्रको निकोपोल सहरमा रुसी ड्रोनले लाग्दा पाँच जना घाइते भएका छन्। निकोपोल निप्रो नदीमा अवस्थित छ र यो रुसी सेनाको युक्रेनी सीमावर्ती शिविरमध्ये एक हो।

नदीको विपरीत किनारमा रहेका मस्कोप्रति बफादार अधिकारी येवगेनी बालिट्स्कीले भने, ‘युक्रेनी ड्रोन बिजुलीको तारमा लाग्दा कम्तीमा पाँच जना घाइते भएका र करिब ४४ हजार सेवाग्राही सेवाबिहीन हुनुपरेको छ।’

युक्रेनले सन् २०२२ देखि रुसभित्र नियमित ड्रोन र मिसाइल आक्रमण गर्दै आएको छ। रियाजान कारखाना रुसको चौथो ठूलो तेल प्रशोधन केन्द्र हो जसले दैनिक २६२ हजार ब्यारेल तेल प्रशोधन गर्छ। आक्रमणले आंशिक उत्पादन बन्द भएको छ। एएफपी