आवामी लिगले गर्यो देशव्यापी लकडाउन आह्वान, हाई अलर्टमा ढाका
काठमाडौँ । बङ्गलादेशको विशेष अदालत ‘अन्तर्राष्ट्रिय अपराध न्यायाधिकरण’ले नोभेम्बर १७ मा पूर्व प्रधानमन्त्री शेख हसिना विरुद्धको फैसला सुनाउने भएको छ । सम्भावित फैसलाकै कारण अहिले बङ्गलादेश तनावग्रस्त छ । शेख हसिनाको पार्टी, अवामी लिगले बिहीबार बन्दको घोषणा गर्यो ।
अवामी लिग बन्दका कारण राजधानी ढाकामा सुरक्षा कडा पारिएको छ र लकडाउन जस्तो अवस्था लागू गरिएको छ । बङ्गलादेश हाई अलर्टमा छ । फौजदारी न्यायाधिकरणले निर्धारित समयमै आफ्नो फैसला सुनाउने अभियोजन टोलीका एक सदस्यले बताएका छन् ।
हसिनासँगै पूर्व गृहमन्त्री असदुज्जमान खान र पूर्व प्रहरी प्रमुख अब्दुल्लाह अल मनुन पनि यस मुद्दामा अभियुक्त छन् । उनीहरूमाथि गत वर्ष विद्यार्थी आन्दोलनलाई दबाउन खोजेको आरोप छ । यो विद्यार्थी आन्दोलनले शेख हसिनालाई प्रधानमन्त्री पदबाट राजीनामा दिन र बङ्गलादेश छोडेर भारत जान बाध्य पारेको थियो ।
तर हसिनाले भने आफूमाथि लगाइएका आरोपहरू मनगढन्ते भएको र आफू विरुद्धको सम्पूर्ण मुद्दा राजनीतिक षड्यन्त्र भएको बताएकी छिन् ।आफ्नो मुद्दाको सुनुवाइ गर्ने न्यायाधिकरण निष्पक्ष नभएको आरोप पनि उनले लगाएकी छिन् ।
