नेतन्याहुलाई माफी दिन इजरायली राष्ट्रपतिलाई ट्रम्पको अनुरोध
वासिङ्टन डीसी । अमेरिकी राष्ट्रपति डोनाल्ड ट्रम्पले इजरायलका राष्ट्रपतिसमक्ष त्यहाँका प्रधानमन्त्री बेन्जामिन नेतन्याहूलाई माफी दिन आग्रह गरेका छन् । ट्रम्पले इज्याक हर्जोगको नाममा एउटा पत्र लेख्दै लामो समयदेखि भ्रष्टाचार मुद्दाको सामना गरिरहेका नेतन्याहुलाई माफी दिन भनेका हुन् । यो मुद्दाले देशमा गहिरो राजनीतिक विभाजन निम्त्याएको छ ।
पत्रमा ट्रम्पले भ्रष्टाचार मुद्दालाई राजनीतिक पूर्वाग्रहबाट प्रेरित र अनुचित भनेका छन् । पत्रमा ट्रम्पले इजरायल र त्यहाँका जनताले तीन वर्षयताको कठिन समयलाई पछाडि छाडिरहेको स्थितिमा निर्णायक युद्धकालमा देशलाई प्रधानमन्त्रीको रूपमा सेवा गरेका र अहिले इजरायललाई शान्तितिर डोहोर्याइरहेका नेतन्याहूलाई पूर्ण माफी दिन आग्रह गरेका छन् ।
ट्रम्पको अनुरोधमा कसरी प्रतिक्रिया दिने भनेर हर्जोगले केही पनि सङ्केत गरेका छैनन् । तर नेतन्याहुमाथिको भ्रष्टाचार मुद्दाले देशमा विचलन र विभाजनको कारण बन्न सक्ने उनको ठम्याई रहेको बुझिएको छ । यो स्थिति टार्न अभियोजन पक्ष र नेतन्याहुबिच सम्झौता होस् भन्ने चाहना उनको छ ।
