हमासले गाजामा आक्रमण गर्ने तयारी गरिरहेको अमेरिकाको दाबी
एजेन्सी
२०८२ कार्तिक २ | मध्यान्ह १२:०७ बजे
वासिङ्टन डीसी । हमासले गाजामा नागरिकहरूलाई आक्रमण गर्ने योजना बनाएको सङ्केत गर्ने विश्वसनीय रिपोर्टहरू प्राप्त भएको अमेरिकी विदेश मन्त्रालयले शनिबार चेतावनी दिएको छ ।
गाजा शान्ति सम्झौताका अन्य ग्यारेन्टरहरू इजिप्ट, कतार र टर्कीलाई पहिले नै जानकारी गराइसकेको र हमासले युद्धविरामका सर्तहरू पालना गर्न माग गरेको बताइएको छ । हमासले यो आक्रमण गर्यो भने गाजाका जनताको सुरक्षा सुनिश्चित गर्न र युद्धविराम कायम राख्न कदम चालिने अमेरिकी विदेश मन्त्रालयको विज्ञप्तिमा भनिएको छ ।
हमासले अहिलेसम्म यस कथनमा कुनै टिप्पणी गरेको छैन । हाल इजरायल र हमासबिच युद्धविरामको पहिलो चरण लागू भएको छ । हमासले जीवित बन्धकहरूलाई रिहा गरेको छ भने मृतकहरूको शव इजरायललाई हस्तान्तरण गर्ने प्रक्रिया जारी छ ।
